Cerpen Naira Syakila Putri, SMPN 2 Sungailiat: Kisah Rase Lempah Kuneng

Mak Mala teburu-buru di dapok e, ngibas rambut panjang e yang sedikit keringet, jantung e dag dig dug dak karuan. Ari ni ukan ari biase. Nayla, anek bini e yang ngerantau ke Jakarta, akhir e balek ke Bangka lah sudeh sekian lame ni.

Kek lebih dari tu, Nayla mawak tamu spesial. Fariz, kawan kek penulis kuliner tekenal dari kuta, badan e nue tinggi. Dorang nek nyicip masekan khas yang kite masek. Lempah kuneng, pemaken tradisional yang diwarisken turun-temurun kek keluarge e.

"Ape gale-gale bahan lah siap, Mak?" Tanyak Nayla sambil masok ke dapok, kulit kuneng langsat e bekilau tetimpa cahaya samar dari dapok. Mate e penoh semangat.
"Lah, Nak. Ni ukan cuman masek biase, lempah kuneng ni ade makna e."

Mak Mala ngadok kuak lempah kuneng yang mendidih kek ati-ati, ngemasokken iresan nanas, ikan tenggiri seger, kek bumbu-bumbu rempah khas yang muet masekan ni bener-bener asli. Sari kunyet merik warne kuneng yang khas, nyiptaken kuak yang kentel kek menarik. Ari tu, ukan masek bai, ade kenangan, ade rase rindu, kek ade arepan.

Pas pemaken e lah siap, Mak Mala mawak mangkok lempah kuneng tu ke mija maken. Bau asem pedes e langsung tecium serumah-rumah. Dengen bangga e, die nyajiken semangkok besak lempah kuning di atas mija. "Nah, ni die, lempah kuning khas Bangka," kate Nayla kek senyum libak e ke Fariz.

Fariz ngambik sesendok kuak lempah kuneng, nyelupken ikan kek nanas e, ude tu ngemasokken e ke dalem mulot. Mate e menceleng, rase e bener-bener laen dari ape pun yang pernah die cube. "Ni luar biase, Mak! Rase e kuat bener, tapi seimbang. Asem, pedes, kek gurih… luar biase!"

Mak Mala tesenyum bangga, ngerase seneng sege usaha e dihargai. "Ni resep dari Ninek e Mak. Dulu, lempah kuning ni disajiken di setiap perayaan penting," kate e kek penoh kebanggaan.

Tapi, suasana maken yang anget tu tiba-tiba berubah waktu Fariz nyebut sikok ide, "Mak, ape Mak pernah mikir kek ngubah lempah kuneng ni jadi pemaken modern? Macem kek nambahken bahan-bahan baru ape dak teknik ngemasek yang lebih gampang. Rase e pacak dibuet lebih ringan, biak lebih pacak diterimak kek urang-urang di kuta."

Ekspresi muke Mak Mala langsung berubah. Mate lembut e mancerken keciwa yang dalem. Amarah pelan-pelan nyale di ati e. Biakpun die berusaha nahan diri, bagi Mak Mala, lempah kuneng bukan cuman pemaken yang pacak di utak-atik sekenek ati. Ni tu warisan, lambang sejarah, kek kenangan mase lalu yang die jage sepenoh ati.

"Lempah kuneng ni lah sempurna, Nak. Men kami ngubah e, ape yang tesisa dari cerite leluhur kami?" Nada suare Mak Mala kedenger tegas kek keras, menggetarken udara di sekitar e. Mate e natap dalem-dalem, penoh kek sejarah ape agik cinta yang lah beraker betahun-tahun lame e.

Die ukan cuman ngebela masakan sederhana, tapi ngejage semuen warisan yang die bawak dari ninek moyang e. Sesuatu yang bagi e dakde tenilai harge e.

Sayang e, Fariz yang lah biase kek ide-ide kreatif di dunie kuliner, tesenyum macem kek dak nangkep ape maksud dari Mak Mala.

"Tapi, Mak, zaman lah berubah. Men kite pacak nyederhanaken bumbu kek nambah dikit kesan modern, pacak bai lempah kuning ni lebih tekenal. Kalok e dak usah makai kunyet banyak igak, atau dak usah maksi nanas. Rase e pacak tetap enak, tapi lebih 'modern', Mak," kate e pakai nada sok tau.

Nenger tu, amarah Mak Mala langsung meledak, Die natap Fariz kek mate yang tajem, penoh kemarahan. "Dek, ka dak tau ape-ape kek semuen ni!" Suare e begeter, penoh emosi. "Sikok kunyet dalem kuak ni ukan cuman ngeberi warne, tapi ngandung kekuatan kek simbol kesuburan tanah kami.

Terasi yang kuat ni rase laut kami yang keras tapi belambor kasih. Pedas e cabik ni semangat idup e urang Bangka. Men semuen ni diubah, ape yang disiseken dari lempah kuneng? Men dakde bumbu tu, lempah kuneng ni imang agik pacak dimaken, tapi ukan rase yang kami kenal."

Nayla yang dari tadi diem akhir e ikut ngumong. "Fariz, pemaken disini ukan cuman soal rase kek populer atau dak e. Ni soal sejarah, soal pulang ke kampong halaman. Pemaken ni punya jiwa, ude tu jiwa ni dak pacak diubah cuman kek ape yang diingen urang luer."

Kate-kate Nayla kek Mak Ayu macem kek ngebentak Fariz. Die tediem, dak ngerti ngape Mak Mala pacak bener-bener marah cuman gawe ide kecit yang menurut e dak seberape. Kek rase penasaran yang makin tinggi.

Fariz lah mutusken nek gi ngejelajah lempah kuneng tu lebih jauh, berarep pacak paham emosi yang ditunjukken Mak Mala. Die bejalen ke beberape warung kecit yang ngejuel lempah kuneng, nyube nyicip kek nanya-nanya pemaken tu.

Di warung sikok ni, ade seurang atok yang agik ngadok panci lempah kuneng berenti bentar natap Fariz pas die nanya asal-usul sajian tu. Lempah kuneng ni dak cuman pemaken, Dek. Ni cerite idup kami. Setiap rase dari asem, pedes, sampai gurih e tu melambangken semangat kami ngejalenin ari-ari keras. Kek kunyet, kek rempah-rempah ni, kami pacak nikmati idup.

Fariz tediem, tekejut kek dalem e arti sajian sederhana tu. Ude tu, Fariz lanjut ke sikok rumah makan sederhana, name e Rumah Makan Mak Ais yang tekenal di desa tu sege jadi tempet terbaik kek nyube lempah kuneng.

Die mesen sikok porsi, duduk di kursi kayu beseblahan kek seurang pelanggan yang ketingok e ingen kek suasana tempet tu. Fariz penasaran, die nanya, Pak, men boleh tau, ngape bapak ingen makan lempah kuneng di sini?"

Bapak tu tesenyum kek mate penoh kenangan. Rumah makan ni lah ade dari zaman ninek e bapak agik muda. Dari dulu sampai sekarang, rase e dak sua berubah, selalu same. Rase lempah kuneng di sini muet bapak balek ke mase lalu, ke kenangan keluarge yang dudok same-same di mija maken, nyicip rase yang kami lah kenal dari generasi ke generasi.

Fariz mulai miker ape kate pelanggan tu. Yang muet istimewa rupe e sege dakde yang berubah dari rase tu. Pelan-pelan, Fariz nyadar makna sajian ni bagi urang Bangka. Rase yang die anggep pacak diubah biak modern kek urang kuta, rupe e ni lah nyawe yang jage ikatan keluarge, jage kenangan generasi ke generasi.

Die balek ke rumah Mak Mala kek muke yang penoh pengertian baru. Waktu nengok e, Mak Mala tesenyum tipis, macem kek tau men Fariz sekarang lah ngerti ape yang die cube nahanken pendapat e.

Mak, kate Fariz pelan, kek nada penoh rase nyesel, Sekarang ku ngerti. Lempah kuneng ni ukan cuman sajian, ni jembatan antara waktu yang lame kek mase sekarang. Makaseh Mak, lah buka mate ku.**


Kurator: Meilanto, Habib Safillah, dan Sudi Setiawan.