Cerpen Amira Ilmia Zahira, SDN 1 Mendo Barat: MENUGAL

Di pagi kelem gelep gulite suasana riuh, suara burong- burong bekico kek ayem bekukok Seulah-ulah ea belagu kek alam. Aler Sungai yang cenen nyatu kek cahaya mataari waktu pagi kelemya. Di tempet tinggel Atok Japer galek nanem padi sama-sama keluarge besarnya dan Atok Muha di ume yang tempet ea dek jauh dari Kampong.

”Yo kita gi menebas ke utan!”  Atok Japer ngajek Keluarganya, Atok Muha untok bukek berume.
Atok Muha, keluarge Atok Japer pun berenti ngawi puknya. Langsong setuje ngikot Atok Japer. Gale-gale  Keluarga Atok Japer dan Atok Muha.

Sama-sama gi besaoh nek nebas berume  untok nanem ume. Nya sekawan gale-gale gi besaoh untuk nebes pon-pon kaye besek kecit babet gale. Ramai semiyek sambil agit-agit nebes pon-pon kaye kek ges nanem ume. Udeh ya nya sekaben tadi nyantai, sambil maken rebus ubi tejel belacin serai sambil bekisah nek mana ngulah ume lak ea.

Setelah lahan hutan di bersihkan kira-kira  lah due bulen dari nebeng pon-pon tadi, keluarge Atok Japer kek Atok Muha nya tadi gi nune berume yang lah ditebes tadi. Dek lama aben asep item legem begumpel langit yang tadi warna biru tae-tae jadi warna mirah dek sepinak aben. Dek siapa lah kawa nampek ea, Atok Japer langsong ngaroh.

 “Ikak tengong api beser ya dek kawa ngelaret berume urang lain!”

“Ok Tok,” saot keluagenya.

“Cepaat men, kiun!” Atok Japer.

Keluarge Atok Japer sibang abek kiun kene sama suat. Lah udeh di tune tadi binateng dalem utan dek jauh dari tanah tune simak ambur terbang, lumpat nyelamat nyawa masing-masing kan dek tekejut nengong api besak nakya inde ea. Atok Japer dek ngeruan agik lah, sama kek keluargenya kiun kene kilek kiya kilek kene dek nyangka api sebesak ya. Nakne inde ea nune musem pandes dek nyangka api sebesak ne dek lama la hade ulik karoh Atok Japer madeh nyuroh ngambik aek kek ges madem api di.

“Tulong ikak ambik aek uges madem api!” kata Atok Japer.

“Aok lah Tok” kata keluarge ea.

Udeh ea Sikit-sikit api tadi mulai padem pon-pon yang lah ditebeng, kek mati tadi lah banyek di maken api.

Lah berape waktu jarek dari nune berume tadi ea Atok Muha, Keluarge Atok Japernya besaoh mersih sisa-sisa yang dek maken api. Sambil mandok lah bersih gale-gale mana kaye yang ngantol di suson langsong muat keret lah sudeh ya. Atok Japer ngesat 10 bateng kaye sebesak lengen nya untuk persiapan nugel lak ea.

Mana urang kelaki tuges ea nugel, urang mentinak tuges ea mintang narok benih padi yang di tugel. Misal ea padi mayeng, padi pulot, padi raden, padi mukot. Seneng ati Atok Japer karna keluarge kek Atok Muha nek mante nya besaoh.

“Men gawi kita lah udeh gale-gale kita nek nugel lak ea!”  Atok Japer.

”Aok lah “ Atok Muha

”Di siap muli alat-alat kek nugel lak ea !“ Atok Japer.

“Aok lah tok, ku pacak kelak bawek kiden uges bibit ume ea.” Atok Muha
“Kita ngawi puk ko luk ok,”! kata Atok Japer.
 Kita besaoh Lak ea baru kita begilir ngawi pek ikak.

Lah setuje gale-gale ea mulai lah nugel pek Atok Japer, ari sutek ea mulai besaoh ngawi punya Atok Muha sesuai dengan akad sebelum ea. Tae-tae tengah nugel Atok Japer pulang dek sepinak aben nya kacer-kacer dek udeh mula urang nugel.

“Nek mana kisah ke pulang luk ne tok, nugel ge lom udeh “ saut Atok Muha.
“Pagi sok ulik kita ngelanjut ea, dek tau ngapa lah ko ade gawe ne boh.” kata Atok Japer.
”Men nakya ok lah pon,” Atok Muha.

Lah udeh ari lusa Atok Muha ngajek Atok Japer agik nyudeh nugel mari, bare sama-sama ngelanjut nugel ea sampai sudeh. kira-kira seminggu lah sudeh nugel. Padi lah mulai tumbuh lah ngeyarum maken ari maken besek padi tumbuh subur.

Dikerinah bener rumput di siang berik tambek. Bier dek di gangge enduk Asen-asen, burung peret. Atok Japer maseng tebek sekelilen ume dari jaren tebek ngisik bajek burok nampek Tunggul-tunggul tinggi udeh e berik terindek. Bier binateng yang lain takot sangka nya urang bener lah.

Setelah ume tumbuh dengan subur kira-kira tige bulen padi lah mulai ngunen, ilang leteh begawi selama betugel nengok padi macem ya subur ea akher ea nyiap alat-alat Kiden untok manen. Men tadi nya betugel besaoh mutek padi ge besaoh lah. Kan dek bagus uman ea nengong urang ramai-ramai mutek padi.

“Nak mana tok, kita gisok mutek padi ko?” kata Atok Muha.
“Aok lah pon mutek padi ke gisok, lusa bare mutek padi ko ulik.” kata Atok Japer.

Lah udeh gale-gale di putek punya Atok Muha. Isok lusa ea mutek padi punya Atok Japer. Padi yang lah diputek tamak ke dalem karong dikumpol nampek pundok ume Atok Japer. Nengong padi banyek pek pundok ade terpiker niat jiet Atok Muha nek malen padi Atok Japer.

Lah tengah malem Atok Muha tadi mulai gerasak gerusuk gi ke pundok Atok Japer nya ngambik sekarong. Pagi sok ea nak me lah Atok Japer gi pundok umenya, lah ateng pek pundok  Atok Japer secengak nengong karong padinya kan nek mari agik suson ea. Ade dek bener ne lah dek keruan agik piker Atok Japer karena kesel atinya langsong pulang madeh kek keluargenya men padinya dek de sekarong.

Lah ateng kumah ngele pala nya mikir nak mana cara nangkep urang malen padinya tadi. Atok Japer madeh kek keluargenya. Sapa pacak nangkep urang yang malen padi ko, ko pacak merik hadieh.
Malem isok ea keluarge lah mulai ngesat yang malen padi Atok japer nya begilir sesuai dengan gilirnya masing-masing.

nde ea Atok Muha yang malen padi dek puas gek ngambik cuma sekarong mari ea, nya nek ngambik ulik. Dek tau kalok men ade keluarge Atok Japer yang mulai ngintai. Sekali nya ngambik ulik, keluarge meratie tingkahnya Tekacer-kacer takot tau urang.

Akher ea setangkep lah kek keluarge Atok Japer. Sekali tae yang malen padinya Atok Japer dek abis piker meranen dek nyangka sekali tae yang malen padinya Atok Muha kawan nya sendirik, karena grigit ati ea.

Atok Japer melapor kek urang desa, dibawek lah Atok Muha yang malen padi di ke kantor desa. Sekali di tanyan bener apa dek ke malen padi Atok Japer. Atok Muha yang malen tadi nya dek ngangkek sekali nek bawek kantor pelisi bare nya madeh gale–gale. Kaloknya lah ngambik padi Atok Japer. Dek sampai atie Atok Japer nengong Atok Muha yang selama ne banyek mante nya begawi nek dibawek ke kantor pelisi. Akher ea pihak Atok Japer kek pihak Desa nya berembok.

“Macem mana Tok Japer kalau kita bawek bai ke kantor pelisi?” kata pihak Desa
“Macem mana ok…. Apa kita damai bai!” Atok Japer
“Terserah atok sih….macem mana menurut Atok terbaik ea.” Pihak Desa  

 Akher ae sudeh lah urusan ea nya damai. Dengan syarat jangen ngulang agik gawi dek pati made dan dek bener ne. Atok Muha nya pun mintak maaf kek Atok Japer dan keluarge nya. Bahwe nya salah khilaf nya dek ngulang agik gawi dek bener ne nya ge male kek Atok Japer Karena lah ade perjanjian tadi Atok Japer dan Atok Muha malen padi tadi.

Akher damai tanpa ade rasa bemusoh idup rukun yang lah udeh biarlah udeh jangen di lakon agik. Semenjak kejadian ya Atok Muha dek suah agik ade piker jiet nek malen hak orang lain yang bukan hak nya sendirik. **

Kurator: Meilanto, Habib Safillah, dan Sudi Setiawan.