Cerpen Belia Zalfa Nawangwulan, SDN 37 Pangkalpinang: Penunjok dalem Gelep

Waktu lah neg mulai senja, ari lah nek mulai gelep, diperempat jalen Ramayana kota pangkalpinang,  ketingok banyek  burong burong walet mulai terbeng diates langet neg turon sambil bertengger di kabel kabel ates lampu merah tu. Kedenger jelas suare burong burong tu, bekicau macem kek neg berebut tempet kek kawan kawan e neg ngecop tempet untuk dorang betengger.

Suare burong tu tapi tedenger merdu bener pas kek suasana sore yang lah mulai gelep tapi agik ramai mubil kek mutor liwat lampu merah disitu. Sinta teringet kek kenangan masa kecit dulu waktu sebelum pindeh dari kota Pangkalpinang neh gati diajak mak kek pak e liwat daerah situ gi maen Ke Ramayana.

Sinta neh imang bukan keturunan urang bangkak asli. Pak e urang jawe, Mak e yang urang Pangkalpinang. Sinta imang lahir di Pangkalpinang, tapi besar kek sekulah di Jakarta. Tapi adelah masa kecil dulu tinggal di Pangkalpinang sebentar. Kinik neh, Pak Sinta lah pindeh tugas ulik ke pangkalpinang neh. Jadi walaupun lah lame dak nempoh Pangkalpinang, tapi kenangan agik kecit dulu agik teringet kek Sinta.

Sinta ni mudel budak kajin kek seneng teros ati e, renyak kek gale urang, nya neh ge kajin kek penasaran kek hal – hal baru. Apa agik ade hal-hal baru pek deket sekiter rumahnya ya, langsunglah nya nyarik tau ade hal ape yang lah terjadi. Sege Sinta ni agik baru pindeh di sekitar perumahan tu, nilah  ge yang ngebuet Sinta jadi penasaran.

Lah berape ari die tinggel di situ, die selalu bai ningok tetangga tetangga e yang sering ngelakuin hal hal budaya adat bangkak. Sinta pun tertarik neg nyari tau cemane adat adat tu. Disitulah semue perjalanan petualangan Sinta untuk mencari tau adat budaya bangkak lebih dalem agik.

Disekulah baru, Sinta mulai belajar banyak hal tentang budaya bangkak. Pas hari senin tu, ade  pelajaran seni budaya. Bu Ani, guru seni budaya tengah ngajar di depan kelas. Bu Ani menjelaskan cemane adat budaya bangkak yang menjadi adat turun temurun orang Bangkak.

Budaya ni selalu dilakukan orang Bangkak di beberape kawasan masyarakat sekitar. Salah satu e ade adat “Nganggong” dari Bangkak. Yang biase kite kenal, adat “Nganggong” tulah tradisi daerah di bangkak belitung, yang sering di lakuin kek masyarakat-masyarakat sekitar. Kayak ngebawek pemaken dari umah ke tempet setempat ke balai desa, ke masjid untuk dimaken same same.

Sinta pun sampai tengangak nenger penjelasan Bu Ani yang bener-bener spesifik, jelas, kek nambah wawasan. Tiba tiba, langkah kaki Bu Ani tertuju kek meja Sinta, “Nah, kalok Sinta lah pernah Lom ikot “Nganggong”?” Kate buk Ani yang tersenyum penasaran.

Sinta ngehela nafas sebelum ngelanjut, “Ku Lom pernah buk, sebener e penasaran lah ku neh kek budaya-budaya bangkak, kebetulan kami bukan urang bangkak asli jadi kurang tau kek kegiatan kayak cemtu buk.” Kate Sinta sambil ngegaruk leher.

Buk Ani ngengangguk sebelum ngelanjut ngumong “ohh, jadi Sinta Lom pernah ok, ibuk ade saran kek ka, ka pasti nek lah Ken ngenal adat budaya bangkak nih lebih jauh? Cemane kalok ka ngajek keluarga ka ngikut “ Nganggong” Pasti seru nya.”

Pulang dari sekulah, Sinta ngerucos masuk ke dalem umah mereh Mak e ngeluncat-luncat. “Mak, Mak suah dak Mak gi “nganggong” mak? Kate Sinta penasaran. “Mak Lom pernah nak, ngape emang e kayak semangat ge ka neh?”.

“sebener e ku nek ngajak Mak nya pegi ke acara adat “Nganggong” Mak.” Abang Sinta yang dak sengajek ngedenger umongan dorang bedue pon dateng. “kalok macem tuh, cemane kalok kite pegi ke acara “Nganggong” kelak? Nek dak? Sudeh ge mesjid belakang rumah kite neh buet acara nganggong lah nya malem bisok acara e” Kate Abang e madeh kek Sinta. Sinta pun muncat mancit ketawak saking ingen e, seneng ati e abang e neg diajak gi ikot acara nganggong tu.


Mak Sinta ge yang biase e diem bai tentang adat budaya bangkak pon tiba-tiba ikut ngumong ge kek omongan dorang tu. “kalok ikak nek ngikut acara “Nganggong” kayak tuh, Mak dak masalah dak, Tapi Mak dak kawa mantu ikak mikin pemaken kek nganggong tu ok leteh.

Banyak kek dibikin. Men ikak neg nganggong ikaklah buet pemaken sendiri kek dibawa nganggong tu”. “Wee mak buet ape pun kek dibawa nganggong ni. “Basing ikaklah buet kue ap bai jadi, mane ikak pacaklah. Kate Mak e sambil ningok Sinta.

Sinta muter utek kepalak e, sampai bekerut kening e saking serius die mikir kek buet ape untuk dibawa nganggong kelak. Dak mungkin pegi nganggong dak bawak apelah dak seger kek amang amang kek bik bik disitu, mane kaben Sinta ini urang baru ulik disitu.

Saking semanget neg ikut nganggong Sinta langsung kedapuk bukek kulkas, ningok ad bahan bahan ap bai yang pacak die buet kek dibawa nganggong kelak. Di kulkas Sinta dapet telok, ade gendum, ade pisang ambon kek mentiga. Sambil buka youtube Sinta pun bukek cara membuat bolu pisang. Sinta buet sendiri bolu pisang kek dibawak nganggong kemasjid, bolu pisang Sinta yang dibet Sinta jadi 2 luyang.

Malem yang ditunggu pon lah dateng, yaitu ngikot acara “Nganggong”. Di rumah e, die lah sibuk ngebantu Mak e ngiris kue yang dibuat tadi disuson didalem dulang dibantu kek Abang kek Pak e yang ngangkat dulang-dulang ke atas kepalak e.

Sinta pegi nganggong same same kek Pak kek Abang e gi ke maesjid dengan  rase kebanggaan, kek seneng riang, ape agik untuk Sinta yang tersenyum lebar girang karena tercapai keinginan e untuk ikot acara nganggong. Lah sampai dorang di mesjid, dorang ningok lah banyak urang-urang ngumpul-ngumpul same same sambil banyek pemaken dijajar didepan e, pandangan Sinta teralih kek bapak bapak jugak kek ibuk ibuk yang agik duduk sambil maken.

Rupe e banyak pemaken yang dianggong urang ke mesjid tu. Ape bai ade, mulai dari ketupat, lepet, ayem, daging sambel, kue, bueh bueh ap bai ade, pantes kate Mak ku dk kawa bikin pemaken kek dibawak nanggong rupe e banyak kek dibuet pemaken e, bukan kue bolu pisang bai. Pikir Sinta dalem ati.

Tapi, yang Sinta tengok bukan hanya tentang pemaken kek lauk pauk e. Sinta ngerase hal yang beda di dalem ati e. Die ngerase bahwa urang-urang yang sekarang duduk disini emang tujuan bukan hanya maken Bai.

Sinta ngerase hal yang berbeda pas ningok bik bik, kek amang amang disitu yang betuker dulang, peduli sikok same lain, dekde yang kurang atau lebih, ngebuet Sinta jadi terharu nek keluar aik mate e, cemane kalo keindahan adat pulau Bangka yang memang sangetlah harmonis kek tentrem. Ketingok bener rase gotong royong, kebersamaan, silaturahmi, keakraban antar sesama masyarakat e sanget rukun kek damai akor satu sama lain.

Pak Sinta yang dudok di sebelah Sinta pon dari tadik rupe e merati Sinta kek megang bahu Sinta. “Sinta...Sinta ingen dak ningok cemane indah e ketentraman kek keharmonisan urang-urang disini?” Kate pak Sinta yang betanyak sambil tersenyum.

“Aok pak, ku ge baru tau kalok ternyata indah bener adat “nganggong” neh, ku dak suah ingenn bener atiku sampai terharu cemneh pak, baru neh lah ku ningok adat budaya Nganggong di bangkak ini sekaligus pacak ikot langsung dalem kegiatan nganggong ini. Ku jadi semakin tahu kek semakin semangat agik nyarik tahu adat adat  budaya bangkak yang lain agik...”

Bantu ku pak ok! Kate Sinta dengan semanget. “Aok nak, budaya adat kite urang bangkak ni imang lah bagus kek indah, sungguh lah nyamen dipandang. Walaupun Bapak bukan urang bangkak asli tapi Bapak lah ngerase nilah tempat tinggal Bapak, tempat anak-anak bapak lahir dan tempat daerah asli Mak ikak.

Jadi Bapak ge makin cinta kek urang Bangkak ini cemtupun kek semuen budaya budaya e. Bapak harep, ka dak a lupa ok kek tanah kelahiran ka, buatlah sesuatu yang pacak ngebanggain pulau Bangka neh anak ok...siape agik yang bakal ngebanggain pulau bangkak kite ini kalok bukan ikak putra putri tanah bangkak ni?”

Siap Pak, Kate Sinta sambil ketawa ngakak. Tulah Bapak Sinta, sosok yang selalu tahu yang jadi Penunjok dalam gelep, saat die dak tahu ape-ape, saat die butuh penuntun, butuh penunjok, Bapak selalu ade kek siap teros membantu kek ngedukung anak-anak e.**

Kurator: Meilanto, Habib Safillah, dan Sudi Setiawan.