Cerpen Karim Abudzar Papinda, SDIT Qurani Adh Dhuhaa Pangkalpinang: Nganggung Kek Kawan-kawan

Kukok Ayem ngebangunku, kek pelahan mate ari lah nampak elok e. Kek mate yang agik separuh ketutop, ku bejalan ke arah jindelo kamar, ngebuka kaco yang lah ngalang sinar bagus di pagi tu. Ku ngirop udara, nua nyamen e, ngebuat badenku jadi seger.

Abis tu ku mulai ngerapi ape bai yang ade diruang kamar. Keluar ku darik kamar, nempoh dapuk sege nak masek soal e perutku la mulai bebunyi. Ku masak ayem yang lah ade di kulkas, sude tu ku guring garing-garing.

Dak pikir panjang sude ayem tu la mateng ku langsung memaken e kek lahap. Lah kenyang perutku sude makan ayem yang ku masak sendirik, ku mulai siap-siap nak mandik. Sudeh mandik badenku bener-bener terase seger kek nyamen.

Tiba-tiba ku keinget kalok ku ade PR yang nak ku gawe, langsung bae ku kerjakan. Sege ku dak kawa lupa, pun ku lupa kek dak ku gawe besok e pacak-pacak ku dihukum di kelas. Alhamdulillah hari ni libur, mesege tengah tanggal mirah, jedi e ku punya banyek waktu buet nyelesai e tugas ni.

Oh, ku ge baru inget kalo ku ade punya tugas kelumpok. Sudeh PR ni selesai, ku langsung izin kek Mak, ku nak pegi ke rumah kawan. Di sane biasa e kami ngegawe tugas kalo ade kerja kelumpok. Tugas kami ni ade due, yang pertama praktek menari Tari Nganggung kek yang kedue diskusi nyari makanan tuk acara Nganggung e.

Pas la nyampe lokasi, rupa e kawan-kawanku la nunggu setengah jam dari tadik.
Kate kawanku “Lame ge ka ni Ali! Kamik la nunggu ka setengah jam. Untung bae kamik ni sabar, Haha.”
“Maaf ok ku lambet, soal e ku agik beberseh kamar kek ngerja PR tadi tu.” Kate ku
“Aok la pun kami maafin ka, tapi jangen diulangi agik ok”
“Makaseh ok la nak maafin ku, hehe”
“Yo, deng lah ngomong ne. Along kita mulai latihan tari Nganggung ni daripada ngobrol terus kelak ngabisin waktu bae.”

Sude 1 jam latihan nari e, kamik berenti suat habis tu nak langsung pulang. Pas kamik la selesai bekemas barang nak pulang, kamik jalan same-same. Dak lama dari tu, di pejalen tiba-tiba kedenger suara deruh ujan di kuping kamik. Rintik-tintik ujan e la mulai nyentuh kulit tangenku, ku kek kawan-kawan langsung beteduh di pondok bermain kamik. Kek nunggu ujan berenti, kamik pun ngemulai bekisah.
Kate kawanku cem ni “Oy pas nari Nganggung tu, kite bawek pemaken, ok?”
“Aok sek, masak dak dibawek. Imang ngape ka nanya cem tu” Kate ku.
“Soal e ku takut kelak tau-tau e dak disuro bawek pemaken. Jedi  e malah ku sendiri yang bawek pemaken e.”

“Oh, tu alasan ka rupa e”

Ditengah-tengah keseruan kamik bekisah, rupa e ujan la berenti. Ku made kek kawan-kawanku.
“Woy! Ujan e la berenti tau dak, along kite pulang yo kerumah. Takut kelak tiba-tiba ujan e turun agik”
“Aoklapun, dah semue e. Kelak kite ketemu agik ok”

Dak kerasa pas ku lah nyampe rumah, langit lah bewarna jingga kek elok nian. Cepet-cepet ku masuk rumah nak mandi, sege e waktu la deket magrib. Badanku terase seger agik sude mandik kek langsung ku menunaikan ibadah sholat. Sudeh sholat, ku kek keluarga maken same-same di meja makan. Kek makan, ku ge bekisah ke Mak Pak ku tentang seru e gawe ku ari ni. Waktu terus bejalan kek jam lah menunjukkan waktu Isya. Pelahan detik jam yang berdetak dak berenti bikin mataku mulai redup, tanpa kerase pun ku lah ketiduk sampai esok ari.

Agik-agik e kukok ayem pas waktu subuh ngebangunku tuk ngemulai ari ni. Macem biasa ku selalu ngeringkes kamar kek langsung ngeberseh baden. Besiap ku berangket ke sekulah ngebawek barang-barang yang kugendong dipunggung. Betemu ku kek kawan di pejalenan gi sekulah.

Ku tegur die “Oi, ketemu agik kite. Cemane ari ni, ka banyak dak bawak pemaken e?”

“Bawak lah, ngape imang e?”

“Dak ngapela ku cuma nanyak bai, ku ge ade la bawak pemaken tau dak”

“Ka buet sendirik atau beli pemaken tu?”

“Buat sendirik sek, sege pun beli ku dak de duit. Ka tau dak, ku bikin risol ni rase e nyamen. Sepuloh kalik lebih nyamen dari yang pernah ka maken.”

“Aok ge? Ku nak la pun nyube risol ka kelak e”

Nyampai di sekulah, ku salam kek guru-guru yang bepapasan dengenku. Kek jalan nuju ke kelas, ku singgah suat di papan pengumuman nak liat jadwal kegiatan Nganggung ari ni, rupa e jadwal e tu ba’da zuhur. Tiba ku di kelas waktu bel masuk langsung bebunyi. Besiap-siap kami mulai ngeluarin gale-gale pemaken yang lah kamik bawak. Sude tu wali kelas kamik nanyak cem ni:

“Ikak tau dak ngape kite harus mempererat tali persaudaraan? Yang tau silahkan angkat tangan.”
Dengan semangat ku angkat tanganku kek ku becakap:
 “Ku, pak”

“Ape Ali, yo jawab”

“Ku tau ape, karena pun kite dak rukun atau dak mempererat tali silaturahmi, maka kite akan saling cuek kek dak peduli kek orang lain”

“Nah pinter Ali, bagus tu jawaban e”

Hati ku seneng bisa ngejawab kek dipuji kek wali kelas, soal e ku jarang angkat tangen pas disuro ngejawab pertanyaan e. Tapi kali ni ku berani karena ku juga tengah semangat nak ngegawe kegiatan Nganggung ni.

Sudeh tu kamik asik bebincang kek guru kek kawan-kawan, dengan nada yang semangat wali kelas langsung ngajak buat makan pemaken yang la kami siapkan.

“Yo kita makan anak-anak, tapi jangan lupa baca doa ok”

Bismillah, kami baca doa kek mulai makan same-same. Alhamdulillah suasana rukun kek damai cem ni rasa e adem bener. Bisa bekisah same becanda kek kawan-kawan, bise denger nasihat kek ilmu dari guru kamik. Ku seneng la pukok e.

Dak kerasa waktu la menunjukkan saat dimane kamik harus sholat Zuhur. Selepas waktu sholat tentu e penampilan tari Nganggung yang lah kami siapkan darik ari-ari kemaren akan dipertunjukkan. Mulai kamik menari di atas panggung dengan rasa pecaye dirik, kamik optimis pukok e penampilan kami ni harus bagus kek sempurna.

Alhamdulillah selesai penampilan kamik dak de salah kecit pun, kek guru-guru ikut bertepuk tangen memuji penampilan kamik. Kamik semue berterimakasih kek senyum lebar di pipi kamik merekah. Semue hasil latihan kami selame ni rupa e dak sia-sia kek kamik semue seneng.**

Kurator: Meilanto, Habib Safillah, dan Sudi Setiawan.