Cerpen Dwi Asiva, SMPN 2 Tempilang: Semanget Perang Ketupat de Atei Urang Mudek

Mentarei pagei menarei de ates gelumbang laot, cahaya e terang inde lampu iyas tiduk bewarna kuning, inde ya lah warna pesiser Pantai Paser Kuning di Tempilang yang jedei sejarah tradisi Perang Ketupat. Sesuai dengen nama e, paser yang bewarna kunenc, aek laot yang biru agak ijeu, tebenc-tebenc yang tinggei, pon kelapa yang benyek, apa agik pas mataarei tenggelem. Mata dirik ge dek malek-malek nengok pemandangan e yang bener-bener begus ya.

De tepei Pantai Paser Kunenc ya, idup mentinak yang benama Dare. Dare yalah budak mentinak berumor 9 taon. Nya salah sikok mentinak cantik de desa e. Dengen beden yg kuros kek rambut item panjeng e ngebuet awan ge sampai maleu maleu nengok cantik e dare ne.

Dare kek kawan-kawan e gelek bemaen layang-layang, mandik aek laot, muet umah-umah derei paser, kek berumong dengen nelayan yang bereu pulang derei laot. Pemandangan pantai e yang bener-bener begus ngebuet Dare ingen bemaen die.

Pantai Paser Kunenc yalan tempet demana setaon sekalei de selenggere tradisei Perang Ketupat yang bener-bener de ingen kek u budak mudek sampai ke urang tua. Benyek urang derei luar Tempilang yang deteng ke Tempilang kek nengok Perang Ketupat ya. Tradisi yang hanya ade setaon sekalei ngebuet Perang Ketupat ya bener-bener istimewa.

De suatu pagey yang cerah, langet dengen laot biru kek awan yang bergerigik ngebuet pemandangan de Pantai Paser Kunenc mangken begus. Pas ya, Dare kek kawan-kawan e gei ke Pantai Paser Kunenc sama-sama.

Kebenya langsung belarei ke laot kek berenang. Dengen asa ingen, kebenya besiram-siram aek laot ya. Ketawa besama, berumong besama, bebegei cerita-cerita lucu ngebuet mataharei ge ikot ketawa nenger cerita-cerita kebenya.

“Woy, suat agik ade Perang Ketupat denik. Yu kita ikot,” kata sikok kawan Dare yang benama Bujang pas kebenya agik mandik de aek laot pantai Paser Kunenc.

“Yu sek e. Dengen kita ikot ngaramai acara ya, kita depet ngelestari adet kita ne,” jeweb Dare.

“Kawa ko dek e. Tiap taon gek yalah kek de tunton,” sambong Cipui dengen judes.

“Dek bet nak ya. Men kan kita urang mudek yang ngelestari adet kita sapa agik,” jeweb Dare.

“Aok bener ya. Pacak-pacak ilang adet kita men kita dek retak,” sambong Bujang kek kawan-kawan laen e.

“Yok kenek ikak, along ko namu pagei,” jeweb Cipui dengen muka mayon.

Akhir e sudeh kebenya bepidu, kebenya teros bemaen die sambil ngumong seberepe seru e Perang Ketupat taon marei. Kebenya dek saber agik kenya suat agik kek ade perayaan Perang Ketupat ulak.
Pas mataarei lah mulai tenggelem, Dare kek kawan-kawan e pulek ke umah masing-masing.

Dengen asa ingen, Dare ngumong kek keluarga e tentang seberepe ingen kek dek saber dengen Perang Ketupat ne. Tiap taon, Dare kek kawan-kawan e pasti ikot pas Perang Ketupat. Kebenya dek suah malek dengen adet yang ade de Tempilang ne.

Arei-arei Dare beleleu dengen penoh asa dek saber, tibe malem searei sebelum acara Perang Ketupat. Dare ngepong mak e muet ketupat sambil becerita apa bi yang kek de gewei Dare kek kawan-kawan e pagei pas Perang Ketupat. Sudeh Dare ngepong mak e muet ketupat, nya masok kamar kek nek cepat tiduk. Dare berinc de tempet tiduk e sambil nengok ke luar tingkap.

“Ko kek ngegewei benyek hal pagei pas Perang Ketupat…” piker Dare sebelum tiduk.

Pagei pon tibe, Dare bengun derei tempet tiduk e dengen asa semanget kek ingen. Kawan-kawan e bekumpol de umah Dare nek nengok adet-adet yang kek de tampel pas arei ya.

“Dare. Oooooo Dare, yu kita gei nengok Perang Ketupat,” tugek kawan-kawan Dare. “Oyy, tunggun! Ko nyiket rambut lok,” jeweb Dare.

Tibe-tibe Cipui liwat nengok kawan-kawan Dare ramai-ramai dumeh Dare.

“Nek ke mana ikak ramai-ramai ne?” Tanyak Cipui.

“Kamei nek nengok Perang Ketupat. Yu nek gei,” ajek Bujang.

“Kawa ko dek, ko nek gei namu,” jeweb Cipui.

Rupa e, Mak Dare nenger kebenya bepidu. Sudeh ya, mak e langsung mereh kawan-kawan Dare.

“Dek bet nakya Cipui, kita harus ngelestari adet kita ne dengen ikot Perang Ketupat. Bier jaman mangken maju, ikak tetep inget kek ngelestari adet kita ne. Teros lah nak ya, supaya adet kita ne dek ilang,” kata mak Dare.

“Aok, bener lah kata Mak. Sampai semile pon kamei kek teros ngelestari adet kita ne,” sambong Dare nya lah siap nek gei.

“Aoklah pon e, ko nek gei lah ikot ikak nengok Perang Ketupat,” kata Cipui dengen ingen.

Udeh ya, kebenya bejelen ke pantai Paser Kunenc sama-sama. Pas kebenya tibe de pantai Paser Kunenc, kebenya nengok benyek mutor kek mubil yang parkir de parkiran die.

Selaen ya nengok benyek urang derei delem maopon luar Tempilang ge deteng kek nengok acara Perang Ketupat ya ngebuet Dare kek kawan-kawan a ngasa ingen kek dek saber agik nek nengok Perang Ketupat e ya. Kebenya dudok de beteu besek tinggei supaya kebenya pacak nengok e.

Waktu beleleu sampai ke acara puncak yalah Perang Ketupat. Dengen asa ingen, Dare kek kawan-kawan e ikot ngeramai acara ya. Betikem ketupat, ketawa sama-sama ngebuet acara ya mangken ramai. Udara yang de penoh asa gurek ketak urang yang ade die, ketupat yang lah benyek de tanah, suara urang-irang die nyarinc begema de pantai Paser Kunenc.

Ketak urang bener-bener ingen kek acara ya. Benyek urang ngumong men kebenya kek deteng agik ke Tempilang kek nengok Perang Ketupat ne. Asa gurek kek kagum ngemenoh derei Dare pas nya nenger seberepe ingen e urang kek adet Tempilang.

Malem sudeh Perang Ketupat, Dare bejelen ke pantai Paser Kunenc kek nengok langet malem e. Dare dudok  de beteu besek yang ade die sambil nengok ke langet. Nengok begus e pemandangan langet malem yang penoh kek bintang-bintang besinar, suara umbak yang teneng negbuet atei Dare penoh asa ingen kek teneng.

Dare nengok langet malen sambil ngeneng acara Perang Ketupat yang bener-bener ramai yang ngebuet Dare mangken ingen dengen kagum.

Derei dulul Dare ngasa kagum dengen adet Tempilang tapi suat ne asa kagum e mangken nua. Adet-adet Tempilang yang benyek inde paser pantai yang dek tae de itong agik sangking penoh e. Pantai Paser Kunenc yang bener-bener begus kek luas, urang-urang yang renyak, kek adet yang penoh ngebuet Dare bener-bener besyukor kenya lah laher de Tempilang ne.

Malem yang teneng sambil nengok lamget malem, Dare teros ngeneng adet-adet Tempilang yang ngebuet nya kagum sampai terharu. Aek mata e nites ke pipei e, aek mata yang nites ya kan aek mata sedih tapi aek mata ingen kek kagum. Bier Dare dek tae ketak adet Bengkek ne, tapi Tempilang ngebukti betepe benyek e, betepe begus e adet-adet yang ade de Bengkek ne.

“Bener… Ko bener-bener kagum kek ketak ne,” kata dare sambil teros nengok langet malem.**

Kurator: Meilanto, Habib Safillah, dan Sudi Setiawan.