Cerpen Adiba Abdillah, SD Negeri 5 Tukak Sadai: Ngangkat

Syamil ke dapok, di tingok mak e tiko bebuet pemakan.

“Muet ape, Mak?” tanyak die.

“Muet kue hengkulun ken bubur kedit,” jawab mak e.

“Ade acara ape nian e?” Syamil nanyak sege biase e mak die jarang bebuet banyak macem e men dak de acara ape-ape.

“Untok ngangkat malem ni, ade acara peringatan Isra’ Mi’raj.”

“Asyiiiikkk…” ingen Syamil nenger bakal ade acara ngangkat di kampung. Itu arti e bakal banyak pemakan di balai.

Hude tu die izin ken mak e nek mandek hure ke aik anyot hame-hame ken kawan-kawan e. Pas la di aik anyot, die, Amba, Ebil, ken Aska bekiso tentang ngangkat itu la.

“Malem ni kite gi hame-hame aok ke masjid e,” ajak Syamil.

“Aoklah,” jawab Amba, Aska ken Ebil herdek.

“Aku nek makai heluar ken bajok yang ade kantong e biar heneng nek ngisek pemakan untok dibuek pulang,” Syamil mada rencana e.

“Aku cemtu tu uge,” kete Aska ken Ebil he-urok-urok.

“Tapi kete mak aku, men urang lum hude hemue makan e dak anggo kite ngantong, nunggu urang la hude bae makan e baru anggo,” kete Amba mada urang tige tu.

“Aokla Ambaaaaa…kami taken,” hawet Syamil.

Malem e, Syamil nulung mak e ngisek hengkulun ken bubur kedit di pireng untok di tarok di dulang. Di dulang tu la tetata empat pireng bubur kedit, ken 2 pireg kue hengkulun. Hude tu dulang ditutup ken tudung haji.

“Gi la, Mil pada ken aya ka, dulang la siap,” kete mak e nyuro Syamil.  Gi la Syamil ke liper adep nungak aya e. Dak lame aya e pun gi ke masjid hare muek dulang yang la diisek pemakan itu.

Syamil gi e herdek ken Amba, Azka ken Ebil, sesuai janji keben die hure tadi. Keben die dak muek apelah, sege dulang e la dibuek aya keben die bae.

Pas keben die hampai di masjid, urang ngebang. Keben die ngikot hemayang iso bejemaah. Hude itu nenger ceramah dari Ustaz Asep.

“Kite duduk e deket lawang bae, biar cepet kite lari ke balai men ceramah la hude,”kate Azka bebisek ken Ebil. Keben die ngambek posisi duduk deket lawang nian, diikot Syamil ken Amba uge e.

Men di kampung urang biase dulang ngangkat di tarok di masjid, tapi men di kampung keben die, dulang e di tarok di balai yang ade di hebela masjid. Men kete Mang Diman, tukoh di kampung tu, biar masjid e dak kutor. Balai mimang dibuet untuk tempet warga ngumpul temasuk untok acara ngangkat.

Syamil ken kawan-kawan e dak habar agek nunggu acara makan-makan di mulai. Kaben die la dak konsentrasi agek nenger ceramah.

“Wassalamu’alaikum warahmatullhi wabarakatuh.”

Hekali nenger halam penutup ceramah dari Ustaz Asep tu, Syamil, Amba, Ebil ken Azka langsung lari ke balai.

“Ati-ati terempes.” Kate Ustaz Doni, guru ngaji keben die, pas ningok keben die lari.

“Aokla, Ustaaazzz…” urang empat tu ngejawab herempak hare lari.

Hampai di balai keben die langsung duduk ngadep dulang. Syamil hame dulang e ken Amba, Ebil hame ken Azka. Kaben die urang empat duduk e bedeket. Ebil mukak tudung haji di dulang yang ade diadep keben die.

“Waaaau… ade lakso kesukaan aku,” kate Ebil heneng.

“Ade ager gule kabung ken bua uge e,” kate Azka dak kala heneng e.

Hedengken di dulang Syamil ken Amba ade empek-empek telok ken kue putu ayu. Dak de bua e.

“Bagi uge kelak bua anggur di dulang ikak tu aok, Bil,” pintak Syamil ke Ebil.

“Enggak kami meri e, maken la ape yang ade di dulang ikak tu,” kate Ebil. Syamil merengot nenger hawet Ebil.

“Pe bebagi, Bil, ketol neh,” kete Amba.

“Hala ikak ngape ngambek dulang yang dak de bua e,” hawet Aska ngedukungn Ebil.

“Ni Azka untok ka, tarok la di kantong ka.” Ebil langsung ngambek bua anggur di dulang tu, die bagi hetenga untok Azka, hetenga untok die. Langsung keben die isek di kantong bajok koko masing-masing.
 
“Ketol uge ikak urang due ni,” kate Amba. Ebil ken Azka cak-cak dak kedenger ken cakap Amba. Hekali la hude maken lakso ken agar gule kabung e, Ebil ken Azka langsung nek pulang.

“Kami pulang dulok aok, daaaa…”Aska ngelambai tangan e ke Syamil ken Amba hare bejalan nuju keluar.
Pas Ebil angkit dari duduk e, die dak hadar kalok bua anggur die tejato. Rupe e kantong bajok die bantit. Diem-diem Syamil ken Amba langsung ngambek anggur Ebil yang jato di lantai tu.

“Ssstttt…” Syamil narok jari telunjuk hebela kire’ e di mulut, meri tando diem ken Amba.

“Qiqiqiq…” Amba cekikik nahan ketawak, gelik ati die.

“Woi! Ikak ngambek bua anggur aku ken?!” Ebil rupe e hadar bua anggur di kantong e dak de agek.
Syamil ken Amba langsung lari nuju ke lawang hare ketawak.

“Hahahah.”

“Huaaaaaaaa… “ Ebil nanges gedeng. Urang yang agek ade di balai tu ningok bae.

“Ngape, Bil?” tanyak Ustaz Doni.

“Syamil ken Amba maleng anggur aku, Ustaz… Hiks hiks hiks.”

Hejak ade Ustaz Doni tu, Syamil ken Amba dak telalu kabur e. Keben die nantek dekat lawang.

“Die mese ketol, Ustaz.” kete Syamil ngebela direk.

“Keben die to maleng, Ustaz,” Aska ngebela Ebil.

“Ikak urang empat ikot Ustaz ke liper masjid!”
 
Syamil, Amba, Aska ken Ebil pun ngikot Ustaz Doni ke liper masjid. Ustaz Doni nanyak ngape kaben die pacak berebut pemakan. Keben die ngejawab e begilir. La hude nenger kisa keben die hikok-hikok, Ustaz Doni pun betanyak, “Ikak taken dak ape pesen dari tradisi ngangkat ni?”

Keben die urang empat nginggel kepale bae.

“Ngangkat itu ngajer kite bebagi. Kite muek pemakan dari uma untuk dimaken hame-hame. Kite pacak betuker pemakan. Men ade urang yang dak de ngangkat karene dak de duit untok bebuet, pacak makan uge hame-hame.” jelas Ustaz Doni

“Jadi berebut pemakan itu dak sesuai ken pesen dari tradisi ngangkat. Jangan diulangi agek aok?”
“Aok, Ustaz.” Kaben die ngejawab herdek.

“Pesen lain e dari tradisi ngangkat tu untok nguat talek silaturrahmi. Kite pacak ngumpul ken hemue warga yang hadir, makan hame-hame, hare bekelakar, biar makin akrab,” jelas Ustaz Doni agek.

 “Men berebut cem ikak tadi tu malah mutus talek silaturrahmi, karena akhir e behakat. Bener dak gawe cemtu?”

“Daaak….” Berek empat ikok tu ngejawab herempak.

“Jadi, ape yang harus dilakukan sekarang biar silaturrahmi dak teputus?” tanyak Ustaz Doni.

“Agar silaturrahmi tidak terputus, pinjem dulu seratus.”

“Hahaha… “ kaben die hemue ketewak nenger jawaban Azka yang niru ungkapan viral. Akhir e keben die saling bemaaf. Keben die bejanji bakal ngejago silaturrahmi ken nek bebagi ken urang lain, macem makna yang tekandung dalem tradisi ngangkat.**


Kurator: Meilanto, Habib Safillah, dan Sudi Setiawan.